திருகோணமலை – கந்தளாய், திவுள்கஸ்வெவ சோமாவதி காட்டுப்பகுதியில் சுமார் ஐந்து ஏக்கர் நிலப்பரப்பில் கஞ்சா பயிர்ச்செய்கையை மேற்கொள்வதற்குத் தயாராக இருந்த நபர் ஒருவர் வனவிலங்கு அதிகாரிகளால் கைது செய்யப்பட்டுள்ளார்.
கந்தளாய் இராணுவப் புலனாய்வுப் பிரிவினருக்குக் கிடைத்த இரகசியத் தகவலையடுத்து, இது தொடர்பில் கந்தளாய் வனவிலங்கு அதிகாரிகளுக்கு அறிவிக்கப்பட்டுள்ளது.
இதனையடுத்து, வனவிலங்கு அதிகாரிகள் முன்னெடுத்த விசேட தேடுதல் நடவடிக்கையின்போதே குறித்த சந்தேகநபர் கைது செய்யப்பட்டுள்ளார்.
இதன்போது, பயிரிடுவதற்குத் தயாரான நிலையில் சுமார் 35 ஆயிரம் கஞ்சா செடிகள் கண்டுபிடிக்கப்பட்டுள்ளன.
சோமாவதி காட்டுப்பகுதியில் சுமார் ஐந்து ஏக்கர் நிலப்பரப்பில் இந்தக் கஞ்சா பயிர்ச்செய்கைக்கான ஏற்பாடுகள் மேற்கொள்ளப்பட்டிருந்ததாக அதிகாரிகள் தெரிவித்துள்ளனர்.
கைது செய்யப்பட்ட சந்தேகநபர் இன்று ஹிங்குராங்கொட நீதிமன்றத்தில் ஆஜர்படுத்தப்படவுள்ளார்.
இந்தச் சம்பவம் தொடர்பான மேலதிக விசாரணைகளை கந்தளாய் வனவிலங்கு அதிகாரிகள் முன்னெடுத்து வருகின்றனர்.
