பாங்காக்: தென் தாய்லாந்தில் கால்பந்து போட்டியின் போது மைதானத்தில் மின்னல் தாக்கியதில் 24 வயது இளம் வீரர் ஒருவர் சம்பவ இடத்திலேயே உயிரிழந்தார். மேலும் 11 பேர் படுகாயமடைந்த சம்பவம் பெரும் சோகத்தை ஏற்படுத்தியுள்ளது.
மைதானத்தில் நடந்த கொடூரம்
தென் தாய்லாந்தின் சுங்கை கோலோக் பகுதியில் உள்ள சன்டிபாப் விளையாட்டரங்கில் விறுவிறுப்பான கால்பந்து போட்டி ஒன்று நடந்து கொண்டிருந்தது. இதில் சாம்கொல்ட்ஸ் மற்றும் அபு எக்ஸ் நொங் சிரின் ஆகிய அணிகள் மோதிக்கொண்டன. [1]
போட்டி நடந்துகொண்டிருந்தபோதே, திடீரென மைதானத்திற்குள் பயங்கர சத்தத்துடன் மின்னல் தாக்கியது. இதில் சாம்கொல்ட்ஸ் அணியைச் சேர்ந்த 24 வயதான சோவ்யான் அவேய் (Sofyan Awei) என்ற வீரர் மீது மின்னல் நேரடியாகப் பாய்ந்தது.
சம்பவ இடத்திலேயே மரணம்
மின்னல் தாக்கிய வேகத்தில் சோவ்யான் அவேய் மைதானத்திலேயே நிலைகுலைந்து சுருண்டு விழுந்தார். சக வீரர்களும் அவசர மருத்துவக் குழுவினரும் அவருக்கு முதலுதவி வழங்கி காப்பாற்ற கடுமையாகப் போராடினர். எனினும், அவர் சிகிச்சை பலனின்றி மைதானத்திலேயே உயிரிழந்தார்.
11 பேர் மருத்துவமனையில் அனுமதி
இந்த மின்னல் விபத்தில் சோவ்யான் அவேய் தவிர, மைதானத்தில் இருந்த மேலும் 11 பேர் படுகாயமடைந்தனர். அவர்கள் அனைவரும் உடனடியாக மீட்கப்பட்டு அருகில் உள்ள மருத்துவமனைக்கு கொண்டு செல்லப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.
கால்பந்து போட்டியின் போது மின்னல் தாக்கி இளம் வீரர் உயிரிழந்த சம்பவம் விளையாட்டு உலகிலும், உள்ளூர் மக்களிடையேயும் பெரும் அதிர்ச்சியையும் சோகத்தையும் ஏற்படுத்தியுள்ளது.
