பேலியாகொடை பிரதான மத்திய மீன் சந்தையில் மீன் விற்பனை நடவடிக்கைகள் தற்போது சுறுசுறுப்படைந்துள்ளன. நாட்டின் பல்வேறு பகுதிகளிலிருந்தும், குறிப்பாக தென் மாகாணத்திலிருந்தும் அதிகளவிலான மீன்கள் சந்தைக்கு வருவதால், கடந்த மாதங்களுடன் ஒப்பிடுகையில் பல்வேறு வகையான மீன்களின் மொத்த மற்றும் சில்லறை விலைகள் சுமார் 50 சதவீதம் வரை குறைவடைந்துள்ளதாகத் தெரிவிக்கப்படுகிறது.
மீன் விலைகளில் ஏற்பட்டுள்ள இந்த வீழ்ச்சி நுகர்வோருக்கு பெரும் நிவாரணமாக அமைந்துள்ளது. குறைந்த செலவில் சத்தான உணவைப் பெற்றுக்கொள்ள முடிவதாகத் தெரிவிக்கும் மக்கள், மீன் கொள்வனவுக்காக சந்தைக்கு வருவோரின் எண்ணிக்கையும் அதிகரித்துள்ளதாகக் குறிப்பிடுகின்றனர்.
தற்போது சந்தையில் ஒரு கிலோகிராம் பலயா மீன் 400 முதல் 650 ரூபாய் வரையிலும், சாலையா மீன் 200 முதல் 450 ரூபாய் வரையிலும், லின்னா மீன் 550 முதல் 700 ரூபாய் வரையிலும் விற்பனை செய்யப்படுகிறது. இதேவேளை, ஹுருல்லா, பாறை, கும்பிலாவ, கெலவல்லா மற்றும் தலபத் உள்ளிட்ட பல்வேறு வகையான மீன்களின் விலைகளும் குறைவடைந்துள்ளதாகத் தெரிவிக்கப்படுகிறது.
வெளிச் சந்தைகள் மற்றும் தொலைதூரப் பகுதிகளின் சந்தைகளுடன் ஒப்பிடுகையில், பேலியாகொடை மீன் சந்தையில் குறைந்த விலையில் மீன்களைக் கொள்வனவு செய்ய முடிவதாக ரத்தினபுரி, அவிசாவளை உள்ளிட்ட பகுதிகளிலிருந்து வருகை தந்த வியாபாரிகளும் கொள்வனவாளர்களும் மகிழ்ச்சி தெரிவித்துள்ளனர்.
மறுபுறம், மீன் விலைகள் குறைந்துள்ளமை வியாபாரிகளுக்கும் சாதகமாக அமைந்துள்ளதாகக் கூறப்படுகிறது. அதிக விலையால் மந்தமடைந்திருந்த விற்பனை நடவடிக்கைகள் மீண்டும் சுறுசுறுப்படைந்துள்ளதுடன், நுகர்வோரின் வருகை அதிகரித்ததால் நாளாந்த விற்பனையும் மேம்பட்டுள்ளதாக வியாபாரிகள் தெரிவிக்கின்றனர்.
மீன்களின் விலைகள் இந்த மட்டத்தில் தொடர்ந்து நிலைத்திருந்தால், நுகர்வோருக்கும் மீன்பிடித் தொழில்துறையினருக்கும் குறிப்பிடத்தக்க நிவாரணம் கிடைக்கும் என்றும் அவர்கள் நம்பிக்கை வெளியிட்டுள்ளனர்.
