இந்தியாவில் மத்திய டெல்லியின் பிரசாத் நகர் பகுதியில் நடந்த கொடூர சம்பவத்தில், 10 வயது சிறுமி கடத்தப்பட்டு பாலியல் வன்முறைக்கு உட்படுத்தப்பட்டார். இந்தச் சம்பவத்தை குறித்த குற்றவாளியை காவல்துறையினர் சிக்கலான விசாரணையின் மூலம் கண்டுபிடித்தனர்.
சம்பவம் கடந்த ஜனவரி 11ஆம் திகதி நடைபெற்றதாக கூறப்படுகிறது. வீதி விளக்குகளில் பூ விற்பனை செய்யும் சிறுமியை, மின்-ரிக்ஷா ஓட்டுநர் தேநீர் வாங்கித் தருவதாக கூறி கடத்தியதாக தகவல் வெளியாகியுள்ளது.
கடத்தப்பட்ட சிறுமியை ஆள்நடமாட்டமற்ற காட்டுப் பகுதிக்கு அழைத்துச் சென்று, அங்கு பாலியல் வன்முறைக்கு உட்படுத்தி, மயங்கிய நிலையில் கைவிடப்பட்டது.
சிறுமிக்கு மருத்துவமனையில் சிகிச்சை அளிக்கப்பட்ட பின்னர், அவர் வழங்கிய தகவல்களே விசாரணையில் முக்கிய திருப்புமுனையாக அமைந்தன. சிறுமி, தன்னை கொண்டு சென்ற இடத்தில் நீல நிறம் பூசப்பட்ட அறை மற்றும் உடைந்த கல் சுவர் இருந்ததாக நினைவுகூரினார்.
இந்த தகவல்களை பின்பற்றி, காவல்துறையினர் சுமார் 20 சதுர கிலோமீட்டர் பரப்பளவை ஆராய்ந்து, 100க்கும் மேற்பட்ட CCTV காட்சிகளை ஆய்வு செய்தனர்.
இதனிடையே, உடைந்த கல் சுவரின் அருகே சிறுமியின் பாதணிகள் கண்டுபிடிக்கப்பட்டது, இது குற்றசெயல் நடைபெற்ற இடமாக உறுதிப்படுத்தப்பட்டது.
மேலும், வெள்ளை நிறக் கூரையுடன் சிவப்பு மின்-ரிக்ஷா மூலம் சிறுமி கடத்தப்பட்டதை CCTV காட்சிகள் உறுதிப்படுத்தியுள்ளன. காவல்துறையினர், கரோல் பாக் மற்றும் ராஜேந்திரா பிளேஸ் பகுதிகளில் உள்ள மின்-ரிக்ஷா தரிப்பிடங்களில் முற்றுகை நடவடிக்கை எடுத்து, சந்தேகத்திற்கிடமான ஒருவரை கைது செய்துள்ளார்கள்.
சந்தேக நபர் உத்தரப்பிரதேசத்தைச் சேர்ந்த 25 வயதுடைய துர்கேஷ் என தெரியவந்தது. அவரிடமிருந்து இரத்தக்கறை படிந்த ஆடைகள் மீட்கப்பட்டு, இது சம்பந்தப்பட்ட குற்றச் சான்றுகளாக பயன்படுத்தப்படும் நிலையில் உள்ளதாக காவல்துறையினர் தெரிவித்தனர்.
பாதிக்கப்பட்ட சிறுமி தற்போது சிகிச்சை பெற்றபின் வீட்டிற்கு திரும்பியுள்ளார். இந்த கொடூரச் சம்பவத்தில் ஈடுபட்ட குற்றவாளிக்கு எதிராக டெல்லி காவல்துறையினர் கடுமையான சட்ட நடவடிக்கைகளை முன்னெடுத்து வருகின்றனர், மேலும் சமூகத்தில் பாதுகாப்பை உறுதிப்படுத்த நடவடிக்கைகள் தீவிரப்படுத்தப்பட்டுள்ளன.