.jpeg)
சமீப காலமாக கல்லூரி ஆண்டு விழாக்களில் சிறப்பு விருந்தினர்களாக அழைக்கப்படுபவர்கள் பெரும்பாலும் யூடியூபர்களாகவே இருக்கின்றனர். கல்வி சார்ந்த உள்ளடக்கங்களை வழங்கி, மக்களுக்கு பயனுள்ள வகையில் பேசும் யூடியூபர்களை அழைப்பது ஒரு நல்ல முயற்சியாக இருக்கலாம்.
ஆனால், சினிமா பாடல்களுக்கு ஆபாசமான நடன அசைவுகளை வெளிப்படுத்தி பிரபலமானவர்களை சிறப்பு விருந்தினர்களாக அழைப்பது பல கேள்விகளை எழுப்புகிறது.
இதில் ஒரு புதிய சர்ச்சை சமீபத்தில் இணையத்தில் பரவி வருகிறது. ‘பிளாக் லவ்வர்ஸ்’ என்ற யூடியூப் சேனல் மூலம் பிரபலமான மௌனி என்ற நபர், தனது சக நடனக் கலைஞரான கீர்த்திகாவால் பாலியல் தொழிலுக்கு பெண்களை தள்ளியதாக குற்றம் சாட்டப்பட்டுள்ளார்.
இதைப் பற்றி ஒரு விரிவான பார்வை இங்கே,
கல்லூரி விழாக்களில் NCC, ரெட் கிராஸ், NSS போன்ற அமைப்புகளைச் சேர்ந்த மாணவிகள் புடை சூழ இந்த யூடியூபர்களை ‘பிளாக் கேப்ஸ்’ போல சுற்றி நின்று வரவேற்கின்றனர்.
இது கல்வி நிறுவனங்களின் நோக்கத்தை கேள்விக்குள்ளாக்குகிறது. கல்வி, பண்பாடு, மற்றும் சமூக முன்னேற்றத்தை மையமாகக் கொண்டிருக்க வேண்டிய இடத்தில், ஆபாச நடனங்களால் பிரபலமானவர்களை முன்னிலைப்படுத்துவது மாணவர்களை எந்த திசையில் நகர்த்துகிறது? இது குறித்து பெரிய அளவிலான விவாதங்கள் நடைபெறாதது ஆச்சரியமளிக்கிறது.
சமூக ஊடகங்களில் கமெண்ட் செக்ஷன்களில் திட்டுவதோடு பிரச்சினை முடிந்துவிடுகிறது. அரசாங்கமோ, பத்திரிகைகளோ இதை கண்டுகொள்ளவில்லை.
மௌனி மற்றும் கீர்த்திகாவின் பயணம்,
‘பிளாக் லவ்வர்ஸ்’ என்ற யூடியூப் சேனலை மோனிகா என்ற பெண்ணுடன் இணைந்து நடத்தி வந்த மௌனி, பின்னர் 2022 முதல் கீர்த்திகா என்ற பெண்ணுடன் இணைந்து பணியாற்றினார்.
இவர்கள் சினிமா பாடல்களுக்கு நடனமாடி, காதல் வசனங்கள் பேசி வெளியிட்ட வீடியோக்கள் மூலம் பெரும் புகழ் பெற்றனர். யூடியூப் மற்றும் இன்ஸ்டாகிராமில் தொடர்ந்து வீடியோக்களை வெளியிட்டு, ஒரு பக்கம் பிரபலமும் மறுபக்கம் பணமும் சம்பாதித்து வந்தனர்.
இவர்களை ‘அண்ணா-அக்கா’ என்று அழைக்கும் ரசிகர் கூட்டமும் உருவானது. ஆனால், இந்த பிரபலத்தின் பின்னால் ஒரு இருண்ட பக்கம் இருப்பதாக கீர்த்திகா சமீபத்தில் வெளியிட்ட வீடியோ ஒன்று அம்பலப்படுத்தியுள்ளது.
கீர்த்திகாவின் அதிர்ச்சி வெளிப்பாடு,
கீர்த்திகா வெளியிட்ட யூடியூப் வீடியோவில், மௌனி பல பெண்களை ஏமாற்றியதாகவும், சீரியல் மற்றும் குறும்பட வாய்ப்புகளை வாங்கித் தருவதாகக் கூறி அவர்களை பாலியல் தொழிலுக்கு தள்ளியதாகவும் குற்றம் சாட்டியுள்ளார்.
'நிறைய கஸ்டமர்கள் இருக்கிறார்கள், அவர்களுக்கு மசாஜ் செய்தால் ஒரு இரவுக்கு 30,000 ரூபாய் கிடைக்கும், செய்கிறீர்களா?' என்று புதுமையான முறையில் பேசி, பெண்களை பாலியல் தொழிலுக்கு ஆட்படுத்தியதாக அவர் குறிப்பிட்டுள்ளார்.
ஒரு இளம்பெண்ணை இப்படி ஏமாற்றி, பாலியல் தொழிலுக்கு அனுப்பியதாகவும் அவர் வெளிப்படையாக பேசியுள்ளார். இந்த வீடியோ கடந்த இரண்டு வாரங்களுக்கு முன் வெளியிடப்பட்டிருந்தாலும், இது பற்றிய செய்திகள் பெரிய அளவில் பரவவில்லை.
சமூகத்தின் அலட்சியம்,
மௌனி மீது இதுவரை அதிகாரப்பூர்வமாக எந்த புகாரும் பதிவு செய்யப்படவில்லை. கீர்த்திகாவின் வீடியோவைத் தவிர, இந்த விவகாரம் பெரிதாக வெளிச்சத்திற்கு வரவில்லை.
இது சமூகத்தின் அலட்சியத்தையும், இதுபோன்ற சம்பவங்களை கையாள்வதில் அரசு மற்றும் ஊடகங்களின் பொறுப்பின்மையையும் காட்டுகிறது. கல்லூரி விழாக்களில் இத்தகைய நபர்களை சிறப்பு விருந்தினர்களாக அழைப்பது, மாணவர்களுக்கு தவறான முன்மாதிரியை உருவாக்குவதோடு, சமூக மதிப்புகளை சீர்குலைக்கிறது. இதை ஒரு தனிநபரின் செயலாக மட்டும் பார்க்காமல், இதற்கு பின்னால் உள்ள பெரிய சமூக பிரச்சினையாகவே கருத வேண்டும்.
கல்லூரி மாணவர்களை எதை நோக்கி இந்த சமூகம் நகர்த்துகிறது என்ற கேள்வி முக்கியமானது. மௌனி போன்றவர்கள் பிரபலமடைவதும், அவர்கள் மீதான குற்றச்சாட்டுகள் புறக்கணிக்கப்படுவதும், நமது கல்வி மற்றும் சமூக அமைப்புகளில் உள்ள குறைபாடுகளை வெளிப்படுத்துகின்றன.
கல்வி நிறுவனங்கள் மாணவர்களுக்கு முன்மாதிரியாக இருக்க வேண்டியவர்களை தேர்ந்தெடுக்கும் போது அதிக பொறுப்புணர்வுடன் செயல்பட வேண்டும்.
அதேபோல், இதுபோன்ற சம்பவங்களை வெளிப்படுத்தும் கீர்த்திகா போன்றவர்களின் குரலுக்கு செவிசாய்க்க வேண்டியது அவசியம். இல்லையெனில், இது போன்ற சம்பவங்கள் தொடர்ந்து நிகழ்ந்து, சமூகத்தின் எதிர்காலத்தை கேள்விக்குறியாக்கும்.