ஹம்பாந்தோட்டை கடற்கரைப் பூங்காவில் நேற்று (07) இரவு நடைபெற்ற இசை நிகழ்ச்சியைப் பார்வையிட்டு மகிழ்ந்த பின்னர், கடலில் படகுச் சவாரி செய்யச் சென்ற மூன்று நண்பர்கள் விபத்தில் சிக்கியுள்ளனர். இதன்போது, 17 வயதுடைய இளைஞர் ஒருவர் காணாமல் போயுள்ளார்.
மைத்திரிகம பகுதியைச் சேர்ந்த 17 வயதுடைய சனஸ் பஹமன் என்ற இளைஞரே இவ்வாறு காணாமல் போயுள்ளார். அவருடன் சென்ற ஏனைய இரு நண்பர்களும் சுசிகம கிராமத்தைச் சேர்ந்த 16 மற்றும் 17 வயதுடையவர்கள் எனத் தெரிவிக்கப்படுகிறது.
இசை நிகழ்ச்சி நிறைவடைந்த பின்னர், இன்று அதிகாலை சுமார் 2 மணியளவில், ஹம்பாந்தோட்டை மீன்பிடித் துறைமுகத்தில் நிறுத்தி வைக்கப்பட்டிருந்த படகு ஒன்றை எடுத்துக்கொண்டு மூவரும் கடலுக்குச் சென்றுள்ளனர்.
குறித்த படகு காணாமல் போன இளைஞரின் தந்தைக்குச் சொந்தமானது எனத் தெரிவிக்கப்படுகிறது.
கடல் கொந்தளிப்பாகக் காணப்பட்டதால் ஏற்பட்ட திடீர் விபத்தில் படகு கவிழ்ந்துள்ளது. இதனால், மூவரும் படகின் பக்கவாட்டுப் பகுதியில் உள்ள மிதவைப் பகுதியில் தொங்கியபடி உயிர் பிழைக்கப் போராடியுள்ளனர்.
சிறிது நேரத்தின் பின்னர், காணாமல் போன இளைஞர் நீந்திச் சென்று கரையை அடைந்து, ஏனைய இரு நண்பர்களையும் காப்பாற்ற உதவி அழைத்து வருவதாகக் கூறிவிட்டுச் சென்றுள்ளார்.
எனினும், கரையை நோக்கி நீந்திச் சென்ற 17 வயதுடைய இளைஞர் இதுவரை காணாமல் போயுள்ளார்.
மறுபுறம், கடலில் தத்தளித்துக் கொண்டிருந்த ஏனைய இரு இளைஞர்களையும் இன்று அதிகாலை சுமார் 4 மணியளவில் அவதானித்த அப்பகுதி மீனவர்கள், அவர்களைப் பாதுகாப்பாக மீட்டுள்ளனர்.
காணாமல் போன இளைஞரைத் தேடும் பணிகள் தற்போது பிரதேச மக்களினதும் மீனவர்களினதும் உதவியுடன் தொடர்ச்சியாக முன்னெடுக்கப்பட்டு வருகின்றன.
