மாற்றுத்திறனாளிகள் ஓட்டுநர் உரிமம் - வெளியான புதிய தகவல்

மாற்றுத்திறனாளிகள் ஓட்டுநர் உரிமம் பெறும் நடைமுறையை மிகவும் இலகுவாகவும் முறைசாரா விதத்திலும் முன்னெடுப்பதற்கு மேற்கொள்ள வேண்டிய எதிர்கால நடவடிக்கைகள் குறித்து சிறப்பு அவதானம் செலுத்தி, போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் ஆலோசனைக் குழுவினால் நியமிக்கப்பட்ட சிறப்புக் குழுவின் முதல் கூட்டம் நாடாளுமன்றத்தில் கூடியது.   

நாடாளுமன்ற உறுப்பினர்களான சுகத் வசந்த டி சில்வா, தினேஷ் ஹேமந்த மற்றும் எம்.டி.சி.எஸ். சதுரி கங்கானி ஆகியோரின் பங்கேற்புடன் நடைபெற்ற இக்கூட்டத்தில், மாற்றுத்திறனாளிகள் ஓட்டுநர் உரிமம் பெறும்போதும், தங்களது குறைபாடுகளுக்கு ஏற்ப வாகனங்களை மாற்றியமைத்து பயன்படுத்தும்போதும் எதிர்கொள்ளும் நடைமுறை மற்றும் சட்டரீதியான பிரச்சினைகள் குறித்து விரிவாகக் கலந்துரையாடப்பட்டது.   

இதன்போது, தேசிய போக்குவரத்து மருத்துவ நிறுவனத்தினால் மேற்கொள்ளப்படும் மருத்துவப் பரிசோதனைகள், குறைபாடுகளின் நிலைக்கு ஏற்ப வழங்கப்படும் மருத்துவப் பரிந்துரைகள் மற்றும் அதற்கேற்ப ஓட்டுநர் உரிமம் வழங்கும் முறைமைகள் குறித்து அவதானம் செலுத்தப்பட்டது. 

முக்கியமாக, மருத்துவப் பரிசோதனைகளை மாவட்ட மட்டத்தில் நடத்துதல், பார்வைக் குறைபாடு உள்ளவர்களுக்கான பார்வை வரம்பு உள்ளிட்ட மருத்துவக் காரணிகளைக் கருத்திற் கொண்டு ஓட்டுநர் உரிமம் பெறக்கூடிய வாகன வகைகளை விரிவுபடுத்துதல், வாகனங்களுக்குப் பொருத்தமான பாதுகாப்பு உபகரணங்களைப் பொருத்துதல் மற்றும் எதிர்கால வர்த்தமானி திருத்தங்கள் குறித்தும் ஆராயப்பட்டது.   

செவிப்புலன் குறைபாடுடைய நபர்களுக்கு ஓட்டுநர் உரிமம் வழங்குவதில் நிலவும் சட்டப்பூர்வ நிலைமை, சிறப்பு அடையாளங்களைப் பயன்படுத்துதல் மற்றும் சைகை மொழி மொழிபெயர்ப்பாளர்களின் உதவியைப் பெறுதல் குறித்தும் விவாதிக்கப்பட்டது. 

மேலும், குறைபாடுகளுக்கு ஏற்ப வாகனங்களை நவீனமயமாக்குவதற்கான நடைமுறைகள் குறித்தும் கவனம் செலுத்தப்பட்டது.   

அத்துடன், ஒரு நபருக்குப் பல வாகனங்களுக்கு உரிமம் வழங்குதல், மருத்துவப் பரிசோதனை நடைமுறைகளை எளிமைப்படுத்துதல் மற்றும் தேசிய போக்குவரத்து மருத்துவ நிறுவனம் மற்றும் மோட்டார் போக்குவரத்துத் துறைக்கு இடையிலான இணையவழி அமைப்பை மேம்படுத்துதல் தொடர்பாகவும் யோசனைகள் முன்வைக்கப்பட்டமை குறிப்பிடத்தக்கது.