ரூ.81 இலட்சம் இலஞ்சம் பெற்றதாக குற்றச்சாட்டு! அபிவிருத்தி உத்தியோகத்தர் கைது

ஊவா மாகாண சபையின் அபிவிருத்தி உத்தியோகத்தர் ஒருவர், லங்கா பொஸ்பேட் லிமிடெட் நிறுவனம் ஊடாக முறையான நடைமுறைகளைப் பின்பற்றாமல், தேர்ந்தெடுக்கப்பட்ட மூன்று நிறுவனங்களுக்கு மட்டும் பொஸ்பேட் ஏற்றுமதி செய்வதற்கு வசதிகளை ஏற்படுத்திக் கொடுத்தமைக்காக ரூ. 8.1 மில்லியன் ரூபாய் இலஞ்சம் பெற்ற குற்றச்சாட்டின் பேரில் இலஞ்சம் அல்லது ஊழல் பற்றிய குற்றச்சாட்டுகளை புலனாய்வு செய்வதற்கான ஆணைக்குழுவினால் (CIABOC) கைது செய்யப்பட்டுள்ளார்.

கைது செய்யப்பட்ட நபர், முன்னாள் இராஜாங்க அமைச்சர் சாமர சம்பத் தசநாயக்கவின் தனிப்பட்ட செயலாளராகப் பணியாற்றியவர் ஆவார்.

இலஞ்ச ஊழல் ஆணைக்குழுவின் அதிகாரிகளால் நேற்று (21) மாலை 4.55 மணியளவில் இந்த விசேட கைது நடவடிக்கை மேற்கொள்ளப்பட்டது.

அரசாங்கத்தால் நிர்ணயிக்கப்பட்ட உரிய நடைமுறைகளைப் பின்பற்றாமல், மூன்று நிறுவனங்களுக்கு மட்டும் பாஸ்பேட் ஏற்றுமதி செய்யவும், அதற்கான ஏற்றுமதி உரிமங்களைப் பெற்றுக்கொடுக்கவும் உதவி செய்ததாக இவர் மீது குற்றம் சாட்டப்பட்டுள்ளது.

இந்தச் சலுகைகளை வழங்கியதற்காக, அந்த நிறுவனங்களிடமிருந்து சந்தேகநபர் ரூ. 8.1 மில்லியன் பணத்தை லஞ்சமாகக் கோரிப் பெற்றுக்கொண்டதாகக் குற்றச்சாட்டுகளில் தெரிவிக்கப்பட்டுள்ளது.

கைது செய்யப்பட்ட சந்தேகநபர் மேலதிக சட்ட நடவடிக்கைகளுக்காக  நீதிமன்றத்தில் ஆஜர்படுத்தப்படவுள்ளார்.