ஐக்கிய நாடுகள் மனித உரிமைகள் பேரவையின் 63ஆவது கூட்டத்தொடர் ஜெனீவாவில் ஆரம்பமானதை அடுத்து, இலங்கையின் மனித உரிமைகள் நிலைமை, பொறுப்புக்கூறல் மற்றும் நல்லிணக்க செயல்முறை குறித்த தனது எழுத்துமூல அறிக்கையை ஐ.நா. மனித உரிமைகள் உயர் ஸ்தானிகர் அலுவலகம் சமர்ப்பித்துள்ளது.
இது நாட்டின் தற்போதைய சூழ்நிலையின் மீது மீண்டும் சர்வதேச நாடுகளின் கவனத்தை ஈர்த்துள்ளது.
இந்த எழுத்து மூல அறிக்கை, பேரவையின் நிகழ்ச்சி நிரலின் 2ஆவது பிரிவின் கீழ் சமர்ப்பிக்கப்பட்டது.
இப்பிரிவானது, மனித உரிமைகள் பேரவையின் கவனம் தேவைப்படும் மனித உரிமைகள் நிலவரங்கள் குறித்து உயர் ஸ்தானிகர் மற்றும் பொதுச் செயலாளரின் அறிக்கைகள் மற்றும் புதுப்பிப்புகளைக் கையாள்கிறது.
இந்த அறிக்கை இலங்கையின் அண்மைய வளர்ச்சிகளை ஆராய்வதுடன், பொறுப்புக்கூறல், நல்லிணக்கம் மற்றும் நிறுவன சீர்திருத்தங்கள் விவகாரத்தில் அரசாங்கம் எட்டியுள்ள முன்னேற்றங்கள் குறித்த தொடர்ச்சியான சர்வதேச பரிசீலனைகளுக்கு மத்தியில் வெளியாகியுள்ளது.
பேரவையின் கூட்டத்தொடரின் ஆரம்ப நிகழ்வுகளில் இலங்கையுடன் தொடர்புடைய மிக முக்கியமான விடயங்களில் ஒன்றாக இந்த எழுத்துமூல அறிக்கை சமர்ப்பிக்கப்பட்டமை இடம்பெற்றது.
அரசாங்கம் எடுத்துள்ள நடவடிக்கைகள் மற்றும் மனித உரிமைகள் மற்றும் பொறுப்புக்கூறல் தொடர்பான தீர்க்கப்படாத கவலைகள் உட்பட, நாட்டின் நிலவரங்கள் குறித்த ஐ.நா. மனித உரிமைகள் அலுவலகத்தின் சமீபத்திய மதிப்பீட்டை இது வழங்குகிறது.
கட்டாயக் காணாமல் போகச் செயல்கள், தீவிர மனித உரிமைகள் மீறல்கள் தொடர்பான பொறுப்புக்கூறல், மக்களுக்கான பாதுகாப்பு மற்றும் இலங்கையின் ஆயுத மோதலின் வடுவை எதிர்கொள்ளக்கூடிய நம்பகமான பொறிமுறைகளின் அவசியம் போன்ற நீண்டகால ஐ.நா. கோரிக்கைகளின்; பின்னணியில் இந்த அறிக்கை வந்துள்ளது.
அதேவேளை, ஜனநாயக நிறுவனங்களை வலுப்படுத்துதல், ஊழலை எதிர்த்துப் போராடுதல் மற்றும் உள்நாட்டுப் பொறிமுறைகள் மூலம் நல்லிணக்கம் மற்றும் பொறுப்புக்கூறலை முன்னெடுத்தல் போன்ற தனது முயற்சிகளை இலங்கை அரசாங்கம் முன்னிலைப்படுத்தி வரும் ஒரு காலகட்டத்தின் பின்னணியிலும் ஐ.நா. மனித உரிமைகள் பேரவையின் இந்தச் சமீபத்திய மதிப்பீடு வந்துள்ளது.
இலங்கையின் முன்னேற்றங்கள் மற்றும் மீதமுள்ள சவால்களைப் பேரவை பரிசீலித்து வரும் நிலையில், ஓ.எச்.சி.எச்.ஆர் இன் இந்த எழுத்துமூல அறிக்கை சமர்ப்பிக்கப்பட்டுள்ளமையானது இலங்கை அரசாங்கம், பாதிக்கப்பட்டவர்கள், சிவில் சமூகங்கள் மற்றும் சர்வதேச பார்வையாளர்களின் சிறப்பு கவனத்தை ஈர்க்குமென எதிர்பார்க்கப்படுகிறது.
இந்த 63ஆவது கூட்டத்தொடர் ஜெனீவாவில் செப்டம்பர் 7ஆம் திகதி ஆரம்பமானதுடன் ஓக்டோபர் 7 வரை தொடரவுள்ளது.
